Projek KuberWêreld -- God se plan

Projek KuberWêreld -- God se plan - Mei/Juniei 2021

Published: Mon, 05/31/21

Beste

Projek KuberWêreld

Bereik die Wêreld met die Evangelie deur die Internet

Mei/Junie 2021 Nuusbrief

Wees gegroet in die aloorwinnende Naam van Jesus Christus

Voltooiïng van Jesus Christus se Groot Opdrag -- God se plan vir Sy Kerk

Jes 66:18: “... die tyd kom dat Ek al die nasies en tonge (taalgroepe*) versamel; en hulle sal kom en my heerlikheid sien. (19) En Ek sal ‘n teken onder hulle doen, en vrygeraaktes uit hulle stuur na die nasies, ... na die ver kuslande (eilande*) wat my tyding nie gehoor en my heerlikheid nie gesien het nie; en hulle sal my heerlikheid onder die nasies verkondig." (* NV) (Beklemtoning my eie)

Op 7:9: "Ná hierdie dinge het ek gesien, en kyk, daar was ‘n groot menigte wat niemand kon tel nie, uit alle nasies en stamme en volke en tale; hulle het gestaan voor die troon en voor die Lam, bekleed met wit klere en met palmtakke in hulle hande" (Beklemtoning my eie)

Digitale Uitreiking -- die Kerk van Jesus Christus se grootste geleentheid ... asook uitdaging. Sal ons die doel bereik?

Soos in ons vorige nuusbrief berig, het Facebook ons advertensierekening gedeaktiveer. Na twee versoeke om hulle besluit te hersien wil dit voorkom of Facebook nou ons advertensierekening permanent gesluit het, alhoewel ons Facebookblaaie steeds funksioneer en ons steeds poste kan plaas.

Dit is met dankbaarheid teenoor die Here dat ons kan reflekteer oor die afgelope jaar en ‘n half waartydens die Here Projek KuberWêreld geseën het met buitengewone resultate. Volgens Facebook is ons advertensies wat skakel na ons Evangelie uitreikblaaie 7.25 miljoen keer gesien vanaf Januarie 2020 tot April vanjaar, waarvan 3.7 miljoen hierdie jaar was. Volgens Facebook was daar 281,236 klikke op ons advertensies, waarvan 120,017 hierdie jaar was. Aan die Here al die dank en eer!

Facebook verskaf geen redes waarom ons advertensierekening gesluit is nie, behalwe dat hulle jou verwys na ‘n e-kursus oor hulle advertensiebeleid en standaarde. Nadat ek hierdie kursus voltooi het, het ek tot die gevolgtrekking gekom dat Facebook se besluit waarskynlik berus op ons “targeting”. Dit is ons teikenveld, wat uit die aard van die saak hoofsaaklik lande is wat die Evangelie van Jesus Christus vyandig gesind is. Wat dan gebeur is dat Moslems, Hindoes en Boediste ons advertensies en uitreikblaaie “flag” of merk as aanstootlik (vir hulle).

Ek glo dat Facebook verstaan dat ons juis nie-Christelike lande teiken met die Evangelieboodskap. Dit is algemeen bekend dat ander godsdienste Christelike evangelisasie as “proselytising” beskou en dit daarom vir hulle 'aanstootlik' is. (Dank God ek is in my ouerhuis ‘geprosiliteer’ vanuit die koninkryk van Satan na die koninkryk van Jesus Christus!)

Die vraag is egter ...

Wat is die pad vorentoe vir Projek KuberWêreld ?

Daar bestaan verskeie moontlikhede, maar ons sal die Here vertrou vir die regte leiding. Ek vra u voorbidding hiervoor asseblief. Hier is ‘n paar moontlikhede wat ons tans oorweeg en ondersoek:

1. Betrek individue, gemeentes en sendingaksies as medewerkers.

Hierdie is eintlik 'n roete wat ons nog al die tyd nastreef, maar met beperkte sukses. Miskien is die tyd nou ryp hiervoor. Missie Oorwin is ‘n bestaande projek wat ten doel het om gemeentes, sendingaksies en individue te mobiliseer om met behulp van die digitale en sosiale media te help uitreik met die Evangelie.

Op die Missie Oorwin uitreikblad verduidelik ons hoe om ‘n uitreikbediening op Facebook te bedryf. Hierdie projek kan uitgebrei word om die mins geëvangeliseerde lande in te sluit. Dit is my gebed dat die Here persone (asook sendingbedieninge) sal roep en inspireer om betrokke te raak. As die Here met jou praat om deel te word van hierdie projek, kontak my asseblief by die eposadres hieronder. Ons wil jou graag hierin bystaan en begelei.

2. Maak gebruik van platforms soos Google Search, Google Ads en andere.

Hierdie is egter ‘n veel duurder en moeilker opsie om dieselfde doelwitte te bereik as op Facebook. Ons sal ‘n groter begroting sowel as kundige hulp nodig hê om hierdie roete met goeie resultate te kan benut.

3. Maak gebruik van professionele diensverskaffers.

Ons kan sommige funksies uitkontrakteer na professionele diensverskaffers, maar weereens, ons sal ‘n veel groter begroting hiervoor nodig hê.

4. Die ander moontlikheid is dat die Here ‘n voltydse persoon of sendingbediening roep om Projek KuberWêreld na die volgende vlak te neem.

Hierdie sal ‘n persoon of bediening moet wees wat Jesus Christus se visie vir die wêreld deel en wat kennis het van digitale en sosiale media, die internet en webblad ontwikkeling, of bereid is om daarin opgelei te word. Indien die Here jou roep maar jy nie oor die vaardighede beskik nie, glo ek dat die Here jou op ‘n spesiale wyse sal toerus, soos Hy dit ook met my gedoen het. Die vaardighede hieronder is belangrik. Nommer 1 is die belangrikste en kan slegs op jou knieë verkry word. Nommers 2 tot 6 kan aangeleer word:

1. Visie vir die Evangelie en die onbereikte wêreld

2. Digitale Media (Internet) bemarking

3. Sosiale media platforms en bemarking

4. Webblad ontwikkeling

5. SEO (Search Engine Optimization)

6. Visuele media, platforms en bemarking

God het nie 'n plan vir jou lewe nie!

God het nie 'n plan vir jou lewe nie -- God het 'n plan! Die vraag is, is jy deel van God se plan? 'n Jarelange vriend van my maak hierdie stelling toe hy my onlangs besoek en die waarheid daarvan tref my tussen die oë. Ek het self vele artikels geskryf met die tema dat God 'n wonderlike plan vir jou lewe het. Alhoewel dit ook waar is as dit reg verduidelik en verstaan word, word dit egter dikwels verkeerd vertolk asof God jou wil seën en voorspoedig maak in jou eie plan vir jou lewe. Hierdie is 'n selfgesentreerde evangelie en growwe misleiding.

Die feit van die saak is egter dat God jou wil deel maak van Sy plan -- en Sy plan behels die voltooiïng van Jesus Christus se Groot Opdrag en die voorbereiding van die Bruid vir Sy wederkoms en die Bruilof van die Lam. Dit beteken nie dat jy nie in 'n sekulêre werk en beroep kan staan nie. Die vraag is egter, waar is jou fokus? Is jy deel van God se plan? Is jy algeheel oorgegee aan God se plan?

Die behoefte aan ‘n digitale en sosiale media opleidingsfasiliteit vir digitale bedieninge

Die sendingveld (en ook gemeentelike bedieninge) is besig om vinnig te verander. Digitale bedieninge het in gemeentes oornag opgespring met die aanvang van Covet. Die sendingveld soos ons dit in die verlede geken het gaan nooit weer dieselfde wees nie. As ons nie vinnig aanpas by die digitale revolusie nie, gaan ons met ’n pap wiel langs die pad gevang word. Ek praat van persoonlike ervaring. Op my ouderdom kan selfs ek nie meer bybly by die ontwikkelinge nie en dit voel vir my of ek ook langs die pad met ‘n papwiel sit.

Ons het opleidingsentrums en kweekskole vir predikante, pastore, sendelinge en geestelike werkers, maar waar klop iemand aan vir opleiding wat geroepe voel vir digitale uitreiking? Daar bestaan reeds opleidingsmateriaal vir al die bogenoemde vaardighede op die internet, maar daar bestaan 'n behoefte aan 'n opleidingsbediening wat hierdie materiaal op 'n gefokusde en praktiese wyse koördineer en aan gemeentes, sendingbedieninge en individue kan aanbied. Miskien is daar iemand wat hier lees met wie die Here praat.

Baie dankie!

Baie dankie aan elkeen wat op een of ander manier vir Projek KuberWêreld help om die Evangelie uit te dra na al die nasies. Baie dankie vir elkeen wat betrokke is in gebedsondersteuning. Baie dankie aan elkeen wat finansieel betrokke is. Mag die Here u ryklik seën! Indien u of u gemeente ‘n bydrae wil maak, kan u die bankbesonderhede hieronder vind.