Projek KuberWêreld Nuusbrief

Projek KuberWêreld Nuusbrief - Maart/April 2021

Published: Tue, 03/30/21

Beste

Projek KuberWêreld

Bereik die Wêreld met die Evangelie deur die Internet

Maart/April 2021 Nuusbrief

Wees gegroet in die aloorwinnende Naam van Jesus Christus!

“Toe open Hy hulle verstand om die Skrifte te verstaan. En Hy sê vir hulle: So is dit geskrywe, en so moes die Christus ly en op die derde dag uit die dode opstaan, en bekering en vergewing van sondes in sy Naam verkondig word aan al die nasies, van Jerusalem af en verder. En julle is getuies van hierdie dinge.” Luk 24:45-48.

Aan die Here al die eer vir die resultate van die Maart-uitreik

Maart 2021 se resultate lyk soos volg:

682,900 Persone is deur Facebook getel wat hierdie maand deur ons advertensies bereik is.
51,017 Reaksies is deur Facebook getel wat op een of ander wyse gereageer het op ons advertensies.
11,451 Klikke is deur Facebook getel op ons advertensies wat skakel na ons uitreikblaaie.

2021 Jaar tot datum lyk die prentjie soos volg:

2,200,589 Persone is deur Facebook getel wat jaar tot datum deur ons advertensies bereik is.
140,198 Reaksies is deur Facebook getel wat op een of ander wyse gereageer het op ons advertensies.
81,710 Klikke is deur Facebook getel op ons advertensies wat skakel na ons uitreikblaaie.

Die manier waarop Facebook se statistieke rapporteer word, het verander

Facebook het veranderinge aangebring aan die manier waarop hulle hul statistieke prosesseer, wat tot gevolg het dat ons resulate vanaf Maart 2021 anders lyk. Dit is as gevolg van veranderinge wat Apple in die privaatheid-stelsel van hulle selfone aangebring het. Dit is ook waarom miljoene mense op hol was om van WhatsApp na ander sosiale media oor te skakel.

Soos u in die grafiese uitbeelding hierbo kan sien, maak Facebook nou 'n onderskeid tussen 'Post Engagements' en 'Post Reactions'. Ek kan nie regtig agterkom wat die verskil tussen hierdie twee kriteria is nie, daarom gebruik ek die laer syfer in ons statistieke.

Daar bestaan ook ander redes waarom ons nie regtig kan staatmaak op die resultate wat deur Facebook verskaf word om ‘n akkurate prentjie te skets nie. Facebook het onder andere hierdie afgelope maand meer as 1,3 miljard valse profiele van hulle platform verwyder. Dit beteken dat ‘n gedeelte van ons advertensies soos berig in Februarie op valse profiele kon beland het. Dit kan moontlik ook verklaar waarom die aantal persone wat in Maart deur ons advertensies bereik is, byna 50% minder is as in Februarie, terwyl ons begroting en die teikenveld presies dieselfde was.

Ons moet dus nie te veel waarde heg aan die statistieke nie. Dit is slegs ‘n riglyn om vir ons aan te dui of ons wel ons arbeidsveld bereik. Die ware vrug op ons bediening word in elke geval nie gereflekteer deur die duisende wat Facebook sê deur ons advertensies bereik is nie, maar eerder daardie handjievol siele wat waarlik met Jesus Christus ontmoet — en daardie resultate sal ons eers eendag in die hemel sien.

Sover as wat ons kan bepaal, was daar jaar tot datum 1,945 terugkerende besoeke op ons Evangelie-webblaaie. Ons het 'n vermoede dat hierdie syfer dalk hoër kan wees as gevolg van die sekuriteitstellings op sommige webblaaiers. Hierdie is die mense vir wie ons in die besonder moet bid.

Die grootste ding wat moet gebeur ...

Die grootste ding wat gebeur het hierdie afgelope maand waaroor ek graag iets wil skryf gaan nie oor Einstein nie, maar ‘n boodskap deur Ds Thys Loubser met die titel, ‘Die Grootste Ding Wat Moet Gebeur’. Die boodskap kom uit Luk 24:36-49 en die grootste ding wat moet gebeur lees ons in vers 45: “Toe open Hy hulle verstand om die Skrifte te verstaan.” Geestelike blindheid vir die boodskap, krag en mandaat van die Evangelie is in werklikheid die mens se grootste probleem. Luk 24:45 is inderdaad die grootste ding wat moet gebeur in die Kerk van Jesus Christus. Dit is die grootste ding wat moet gebeur op die sendingvelde van die wêreld. Dit is die grootste ding wat moet gebeur in my en jou lewe. Ek gaan slegs ‘n paar sinnetjies uit die boodskap aanhaal wat spesifiek betrekking het op Projek KuberWêreld se bediening. Luister gerus na die hele boodskap by die skakel hierbo — dit is ‘n kosbare boodskap!

Wat is die uitwerking van die grootste ding wat moet gebeur?

“Wat is die uitwerking? ... Die eerste is Christus word jou alles. Dis die uitwerking. As God jou verstand oopmaak word jy oorweldig met Sy Seun. Jy verdrink in die liefde van Sy Seun. Jou opstaan, jou lê, jou kom en jou gaan, is Christus Jesus. Jy raak so verknog en so geheg aan Hom dat jou hele lewe draai om Hom. ... Sy boodskap word vir jou glanshelder. ... Ek word ‘n boodskapdraer van Christus — dis die uitwerking. ... Jy word ‘n verkondiger van hierdie boodskap na die hele wêreld. ... Dis ‘n boodskap vir die wêreld. ...

Dis nie net vir ‘n klompie Afrikaanssprekendes aan die suidpunt van Afrika nie. As ek Christus verstaan en my verstand oopgemaak word, dan verstaan ek wêreldwye evangelisasie wat gedoen moet word — tot aan die uithoeke van die wêreld. Ons mag nie rus nie totdat hierdie boodskap uitgegolf het tot aan die verste verste eindes. As ek hoor van onbereikte groepe .. moet my ore opspring en ek moet vra, wat kan ek doen? Want my verstand is oopgemaak. Ek verstaan nou die hartklop van God vir ‘n verloregaande wêreld. ... Dit help regtig nie baie om in die kerk te sit en niks te doen nie. Dis eintlik groot moeilikheid. ... Jy en ek is geroep om hierdie boodskap te dra na al die nasies. ...”

Baie dankie!

Baie dankie aan elkeen wat op een of ander manier vir Projek KuberWêreld help om hierdie boodskap uit te dra na al die nasies. Baie dankie vir elkeen wat betrokke is in gebedsondersteuning. Baie dankie aan elkeen wat finansieel betrokke is. Mag die Here u ryklik seën! Indien u of u gemeente ‘n bydrae wil maak, kan u die bankbesonderhede hieronder vind.