Projek KuberWêreld - Spesiale Desember 2020 Dankiebriefie

Published: Mon, 12/14/20

Beste

Projek KuberWêreld

Bereik die Wêreld met die Evangelie deur die Internet

Spesiale Desember 2020 Dankiebriefie

Wees gegroet in die oorwinnende Naam van Jesus Christus!

Van die Krip, na die Kruis, na die Wolke

Mat 1:21: "... en sy sal ‘n seun baar, en jy moet Hom Jesus noem, want dit is Hy wat sy volk van hulle sondes sal verlos.

Sonder die Kruis, is die boodskap van die Krip betekenisloos. Terwyl die wêreld se fokus op die ('n) krip, die liggies en die geskenke is, is ons fokus op die Kruis en Jesus Christus se wederkoms.

Fil 2:6-11 som Kersfees vir die kind van die Here so pragtig op: "Hy wat in die gestalte van God was, het sy bestaan op Godgelyke wyse nie beskou as iets waaraan Hy Hom moes vasklem nie, maar Hy het Homself verneder deur die gestalte van 'n slaaf aan te neem en aan mense gelyk te word. En toe Hy as mens verskyn het, het Hy Homself verder verneder. Hy was gehoorsaam tot in die dood, ja, die dood aan die kruis. Daarom het God Hom ook tot die hoogste eer verhef en Hom die Naam gegee wat bo elke naam is, sodat in die Naam van Jesus elkeen wat in die hemel en op die aarde en onder die aarde is, die knie sou buig, en elke tong sou erken: “Jesus Christus is Here!” tot eer van God die Vader." (NAV. Beklemtoning my eie)

Projek KuberWêreld sê dankie en bid u 'n geseënde Christusfees en Nuwe Jaar toe.

Ons wil graag aan een en elkeen van u wat gedurende die afgelope jaar vir ons gebid het, finansieel ondersteun het, of net ons nuusbriewe gelees en ons bemoedig het, baie dankie sê. Terwyl ons aan God al die eer gee, erken ons ook dat u 'n spesiale aandeel het in die 3,543,703 mense in die mins-geevangeliseerde wereld wat gedurende 2020 met ons advertensies bereik is, die 161,219 soekende klikke op die skakels na ons Evangeliese uitreikblaaie -- en elke siel wat by Jesus Christus uitgekom het.

Ons bid u 'n geseënde Christusfees toe en mag die opgestane, verrese Jesus Christus u pad verlig en lei gedurende 2021. Alhoewel ons nie weet wat 2021 vir ons inhou nie, weet ons WIE dit hou!

Kyk af na die Krip

Kyk op na die Kruis

Kyk boontoe na die wolke!

Ek gaan nou ook 'n bietjie rus en (spreekwoordelik) die rekenaar afskakel. So die Here wil sal ons weer einde Januarie/begin Februarie 2021 die volgende nuusbrief uitstuur. Moet asseblief nie ophou om vir ons en Projek KuberWêreld te bid nie.