Ons het die afgelope drie maande die eerste drie stappe behandel. Die eerste was, ‘n Geesvervulde Lewe; die tweede was, ‘n Liefde vir die Woord; die derde was, ‘n Lewende Gebedslewe. Die vierde is:

Dit is van absolute belang dat, bo en behalwe intensiewe studie van sekere gedeeltes of onderwerpe, ons die Bybel van voor tot agter sal deurlees op ‘n gereelde basis. Dit is van absolute belang om ‘n geheelbeeld van die Bybelboodskap te kry as ek wil dat die Heilige Gees my in die volle waarheid van die Woord sal lei!

Die gevaar is dat ons die Bybel kan lees vanuit ‘n bepaalde perspektief of deur ‘n gekleurde bril. Sommige lees die Bybel soos ’n mens vis eet — jy lees die lekker gedeeltes maar die grate spoeg jy uit. Ek het onlangs die voorreg gehad (wat ek nie dikwels het nie) om saam met my gesin snoek te eet. Shoe! Dis lekker. Maar oooh die grate! Daar bestaan ‘n groot gevaar om die Bybel te lees soos jy snoek eet.

Om ’n geheelbeeld van die Bybelboodskap te kry kan geïllustreer word aan die hand van die verhaal van elektrisiteit. ’n Mens kan jou so verdiep in die geskiedenis en wetenskap van elektrisiteit dat jy nooit die volledige prentjie sien nie. Jy kan die opwekking van elektrisiteit bestudeer — en dis belangrik! Of jy kan die aanwending en installering van elektrisiteit bestudeer en elkeen van hierdie areas het weer ‘n magdom van toepassings en spesialiteitsrigtings — en almal is belangrik. Maar hoe lyk die geheelprentjie van elektrisiteit? Dit lyk soos die foto hier onder.