En toe gebeur dit! 

Aan die Here al die eer!

Operasie Een Ding

 Nuusbrief 

Jan/Feb 2026

...

Hierdie maand se nuus in 'n neutedop

• Ons YouTube kanaal steek die 4 miljoen kyke merk verby -- aan die Here al die eer!
•  Ons Evangelie-uitreikvideos op YouTube ontvang 634,449 besoeke in die mins-geëvangeliseerde wêreld gedurende Januarie, met 96,748 besoeke op ons webblaaie. Prys die Here! 'n Bondige opsomming van elke video.
• Die Here Is My Herder -- ons eerste musiekvideo.
• Die geheim van 'n effektiewe en vrugbare getuienislewe.
• So klim jy saam met Operasie Een Ding op die vlug na die uiteindes van die aarde.

Ons YouTube kanaal steek die 4 miljoen kyke merk verby! Aan die Here al die eer!

Ons prys die Here dat ons Evangelie-uitreikvideos op YouTube 634,449 besoeke in die mins-geëvangeliseerde wêreld ontvang het gedurende Januarie, waarvan 96,748 ons webblaaie besoek het!

Hierdie video begin met die vraag, Will A Sinner Go To Heaven? Die vraag word dan beantwoord met 'n ondubbelsinnige antwoord vanuit die Skrif: "No, only redeemed sinners will go to heaven." 'n Volledige aanbieding van die Evangelie volg hierop, waarna die kyker in 'n sondaarsgebed ingelei word. Die video sluit af met 'n oproep tot geestelike groei en lei die kyker na die 'The Secret Of God's Purpose' webblad om dieper te lees. 

Hierdie video het 215,521 kyke ontvang gedurende Januarie en daar was 27,519 besoeke op die indeksbladsy van 'The Secret Of God's Purpose' webblad.

Om mee te begin word die Bybel aan die kyker bekend gestel as die enigste betroubare bron van waarheid omtrent sonde; en word die video, 'Ten Reasons Why You Can Trust The Bible As God's Word, aan die kyker bekend gestel. Die video beskryf dan verder sewe fundamentele Bybelse waarhede omtrent sonde wat elke mens moet weet! Die sewende waarheid beskryf die oplossing vir die probleem van sonde en lei die kyker in 'n sondaarsgebed.

Hierdie video het 240,532 kyke ontvang gedurende Desember en daar was 33,364 besoeke op die indeksbladsy van 'The Secret Of God's Purpose' webblad.

'Help Me Find God' is 'n kort video wat 'n opsomming bevat van die Help Me Find God webblad. Die video bekelmtoon die waarheid dat 'n mens slegs ware lewensdoel en vervulling sal vind wanneer jy God vind. Hierdie video is gemik op soekende siele en begelei hulle dan na die webblad waar hulle in besonderhede deur die volgende twee waarhede gelei word: 1. Waar om te soek na, en te leer van God; en 2. Hoe om in 'n persoonlike verhouding met Hom te tree deur Jesus Christus. 

Die 'Help Me Find God' video (hierbo) het 211,936 kyke ontvang gedurende Januarie en daar was 35,865 besoeke op die 'Help Me Find God' webblad (hieronder).

Hier is die skakel na die Indeksbladsy van 'Secret Of God's Purpose' webblad:

Daar was 'n totaal van 60,883 besoeke op die SOGP webblad hierbo.

Die Here Is My Herder -- Ons eerste musiekvideo

Volg asseblief die skakel na die video en luister na hierdie pragtige lied! Al die eer aan die Here! 

Deel asseblief hierdie video op jou sosiale media met vriende en familie.

Ons is dankbaar teenoor Vader vir elke geleentheid om die Evangelie die wêreld in te dra! Soos ons reeds in vorige nuusbriewe gedeel het, is ons intens bewus daarvan dat die Here besig is om nuwe deure vir die Evangelie oop te maak deur middel van Kunsmatige Intelligensie. Terwyl ons deeglik bewus is van die gevare wat KI inhou as dit verkeerd gebruik word of in die verkeerde hande val, is dit ons oortuiging dat KI in die eerste plek deur God daargestel is om die hele wêreld met die Evangelie te bereik en Sy Groot Opdrag te vervul. Mag die Here ons wysheid gee om Sy gawes vrugbaar te gebruik. 

Wie sit agter KI -- God of Satan?

Die antwoord is -- dit hang af wie dit gebruik! Maar daar is net EEN Skepper -- en ons weet Wie dit is! Hierdie is my indruk van, en opinie omtrent Kunsmatige Intelligensie: Toe die Here sien dat die Kerk nie die Groot Opdrag betyds uitgevoer gaan kry voor Sy wederkoms nie, gee Hy vir ons spesiale instrumente om die taak te turbostoot. Hy openbaar iets van Sy bonatuurlik krag om Sy hemelse doel en plan tot vervulling te bring, naamlik, om die Groot Opdrag te voltooi en die Evangelie na elke volk, stam en taal uit te dra, sodat Jesus Christus kan terugkom om Sy bruid te kom haal. 

Eers was dit die internet en opkoms van digitale tegnologie -- nou is dit Kunsmatige Intelligensie. Die mens dink dit is hy wat so slim is, terwyl hy gladnie God se hand in hierdie dinge raaksien nie. Die hoofdoel van digitale tegnologie en KI is die uitvoering van die Groot Opdrag en God se doel en plan met die wêreld -- en alle ander gebruike is sekondêr hieraan. 

Die groot gevaar van KI is misleiding. Kinders van die Here het die onderskeiding van die Heilige Gees broodnodig! Enige iemand wat dit op 'n onverantwoordelike wyse, of as 'n plaasvervanger vir die Woord van God en die werk van die Heilige Gees gebruik, sal tot verantwoording voor God geroep word!

Die geheim van 'n effektiewe en vrugbare getuienislewe

Een van die sentrale Bybelse beloftes omtrent Christenskap wat grootliks onvervuld is in baie Christene se lewens, is ons getuienislewe. Die baie bekende teksvers van Han 1:8 lees soos volg: "Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judéa en Samaría en tot aan die uiterste van die aarde." Meeste Christene ken hierdie teksvers uit hul kop, maar 'n klein minderheid ervaar die krag daarvan.

Han 1:8 openbaar die geheim van 'n vrugbare getuienislewe, naamlik die "krag van die Heilige Gees". Dit beteken dat wanneer die Heilige Gees op die troon van my hart woon, Hy my bonatuurlik bekragtig om Sy getuie te wees. Met ander woorde, alhoewel dit 'n opdrag is, is dit nie iets wat ek uit dwang en eie krag moet doen nie -- dit is die Heilige Gees wat my daartoe aanvuur en bekragtig. Die groot vraag is, is die Heilige Gees op die troon van my hart?

Dit bring ons by nog 'n baie belangrike vraag, naamlik, as 'n belydende Christen geen begeerte het om 'n getuie vir Jesus te wees nie, staan so iemand se geloof moontlik op 'n valse fondament? Die antwoord is onteenseglik, ja! Dit is 'n simptoom van die afwesigheid van die Heilige Gees! Dit is 'n simptoom van vormgodsdiens. Vormgodsdiens is godsdiens sonder die Heilige Gees. Een van die grootste probleme in die kerk van ons dag, is vormgodsdiens. 'n Ander beskrywing van vormgodsdiens is Heilige Gees-lose geloof.

'n Persoonlike brief van my aan jou -- help my asseblief!, is 'n digitale traktaatjie wat jy met vrug kan gebruik deur dit te deel op jou sosiale media met persone met jy wie die Here jou belas oor moontlike vormgodsdiens. Volg gerus die skakel na die boodskap. As jy geen las vir verlore mense in jou familie of gemeenskap het nie, is die boodskap dalk vir jou! 

Klim vandag saam met Operasie Een Ding op die vlug na die uiteindes van die aarde

Belangrike skakels