Projek KuberWêreld -- Sept/Okt 2024

Published: Mon, 09/30/24

Updated: Mon, 09/30/24

Die verskil tussen 'n Aardse fokus en 'n Ewigheidsfokus en waarom dit saak maak

Projek KuberWêreld Nuusbrief

Sept/Okt 2024

2 Kor 4:18: "Ons oog is nie op die sigbare dinge gerig nie, maar op die onsigbare; want die sigbare dinge is tydelik, maar die onsigbare ewig.

2 Kor 5:7: "... want ons lewe deur geloof, nie deur sien nie." (NAV)

Projek KuberWêreld

Bereik die Wêreld met die Evangelie deur digitale media

'n Projek van Scripture Educational Programs

in samewerking met Aksie 1:8

Wat is die verskil tussen 'n aardse fokus en 'n ewigheidsfokus?

'n Aardse fokus is gerig op die mens -- my, my gesin, my mense en my gemeente se geestelike en fisiese behoeftes. Die Evangelie is hoofsaaklik 'n instrument om my, my gesin en my mense se behoeftes te vervul. 'n Aardse fokus is mens-gesentreerd.

'n Ewigheidsfokus is gerig op God -- op dit waarmee God besig is in die wêreld en hoe ek 'n instrument in Sy hand kan wees om Sy doel te bereik. 'n Ewigheidsfokus is God-gesentreerd. 'n Ewigheidsfokus sluit nie die mens se behoeftes uit nie, maar dit is ondergeskik aan dit waarmee God besig is in die wêreld. Jesus Christus het immers vir die mens gesterf -- en alhoewel die mens sentraal staan in God se reddingsplan, is die doel daarvan om God en Sy plan vir die wêreld sentraal te maak in die hart van die mens.

Die algemene Evangelie van ons tyd is 'n mensgerigte Evangelie. Daar is 'n ongebalanseerde klem op die liefde van God terwyl die resultaat daarvan, naamlik my liefde vir God, grootliks onderbeklemtoon word. Jesus Christus het my so lief gehad dat Hy Sy lewe vir my afgelê het -- met die doel dat ek my (ou en aardse) lewe vir Hom en Sy ewighheidsdoel sal aflê. Die kern van die Evangelie is 'n huwelik tussen my en Jesus Christus -- nie 'n 'sugerdaddy' verbintenis nie.

Wat is die simptome van 'n ewigheidsfokus in die lewe van 'n Christen?

Vervolg onder.

YouTube se vlerke stuur die Evangelie die wêreld in deur Projek KuberWêreld se bediening

Die eerste drie onderstaande videos is gebruik vir uitreike na die mins-geëvangeliseerde lande van die wêreld gedurende September. Elkeen van hierdie videos bevat dieselfde boodskap, maar die inleiding is aangepas om spesifieke wêrelddele te bereik. Elke video (met uitsondering van die Afrikaanse video) se onderskrifte is sorgvuldig beplan sodat dit lewendig in enige van meer as 100 wêreldtale gelees kan word deur Google Translate.

Bostaande video is gebruik vir uitreik na Afrikalande gedurende September en het 16,380 kyke ontvang.

Bostaande video is gebruik vir uitreik na Asiese lande gedurende September en het 19,619 kyke ontvang.

Bostaande video is gebruik vir uitreik na Arabiese lande gedurende September en het 26,091 kyke ontvang.

Bostaande video het met 'n klein begroting 4,056 kyke in Suid Afrika gedurende September ontvang.

Facebook se vlerke help ons om die mins-geëvangeliseerde wêreld met die Evangelie te bereik

Die 'Help Me Find God' webblad is gedurende September op Facebook gepromofeer na lande in die 10/40 venster. Ons advertensie is deur 71,908 persone gesien, waarvan 1,668 geklik het op die skakel na die webblad. Daar was in totaal 8,202 reaksies op die advertensie.

Baie dankie aan Nita Orsmond wat ons help met Facebook uitreike. Besoek gerus haar Facebookblad by hierdie skakel en haar uitreikblad hierdie skakel.

Aan die Here al ons dank en eer vir die resultate van ons uitreike! Dankie ook aan elke medewerker, finansiële- en gebedsondersteuner wat dit help moontlik maak. Bid asseblief dat die saad wat gesaai is in harte sal ontkiem en groei.

Wat is die simptome van 'n ewigheidsfokus in die lewe van 'n Christen?

'n Ewigheidsfokus is die primêre teken van geestelike lewe. 'n Ewigheidsfokus is die waterskeiding tussen vormgodsdiens en geestelike lewe.

'n Ewigheidsfokus het 'n lewende wederkomsverwagting en -verlange tot gevolg. Waar daar geen wederkomsvisie is nie, is daar ook nie 'n ewigheidsfokus nie.

'n Ewigheidsfokus het onvermydelik ook 'n fokus op die voltooiïng van Jesus Christus se Groot Opdrag en die bereiking van die onbereikte wêreld tot gevolg. Die wederkoms van Jesus en die voltooiïng van die Groot Opdrag hou verband met mekaar want die wederkoms van Jesus Christus sal nie plaasvind voor die Bruid verteenwoordigend is van elke volk, stam en taal nie.

Waarom het ons herlewing nodig?

Omdat die Kerk van ons tyd 'n groter aardse fokus as ewigheidsfokus het. Omdat die Kerk van ons tyd meer bekommerd is oor aardse probleme as oor verlore siele en God se ewigheidsdoel en -plan met die Kerk.

Omdat die Kerk van ons tyd 'n gebrekkige wederkomsverwagting en -verlange het.

Omdat die Kerk van ons tyd 'n gebrekkige visie het vir die voltooiïng van Jesus Christus se Groot Opdrag.

Omdat bogenoemde faktore simptomaties is van vormgodsdiens en 'n gebrek aan geestelike lewe en -toewyding. Ewigheidsfokus is die werk van die Heilige Gees. Geen mens kan 'n ewigheidsfokus opwek deur menslike metodes nie. Daarom het ons herlewing nodig.

Wat is die geheim van persoonlike herlewing?

Die geheim van persoonlike herlewing is 'n algehele oorgawe van my hele lewe tot God se beskikking om Sy hemelse doel en plan in en deur my lewe tot uitvoering te bring. Lees gerus hierdie boek; Absolute Surrender deur Dr Andrew Murray. Dit kan gratis afgelaai word by hierdie skakel.

Klim saam met Projek KuberWêreld op die 'Bereik Die Wêreld' vlug na die uiteindes van die aarde

Sal jy en jou gemeente saam met ons op die Bereik Die Wêreld vlug klim na die uiteindes van die aarde? Sal jy deur gebed, digitale uitreiking, of finansiële ondersteuning betrokke raak by hierdie groot visie? 'n Gereelde maandelikse bydrae van so min as R100, kan soveel as 1,700 mense per jaar met die Evangelie bereik. Klik op die foto vir ons bankbesonderhede of maak 'n donasie op SnapScan.

Baie dankie

Baie dankie aan elke persoon of gemeente wat op een of ander manier vir Projek KuberWêreld help om die Evangelie uit te dra na al die nasies. Baie dankie aan elke medewerker wat betrokke is in gebedsondersteuning, finansiële ondersteuning, digitale uitreiking, of mobilisering. Mag die Here u ryklik seën! Indien u of u gemeente ‘n bydrae wil maak deur EFT, volg die skakel na ons bankbesonderhede.