Projek KuberWêreld -- Julie/Aug 2024

Published: Wed, 07/31/24

Ses misverstande wat veroorsaak dat Christene en gemeentes God se primêre doel en plan vir hulle lewens mis

(Berig heel onder)

Projek KuberWêreld Nuusbrief

Julie/Aug 2024

"Wie vader of moeder bo My liefhet, is My nie waardig nie; en wie seun of dogter (sy eie gesin, eie mense en eie land) bo My (My plan en doel vir die wêreld, die Kerk, en jou lewe, soos dit in die Bybel geopenbaar word) liefhet, is My nie waardig nie. En wie sy kruis nie opneem en agter My (My Woord, insluitend My Groot Opdrag) volg nie, is My nie waardig nie. Wie sy lewe vind, sal dit verloor; en wie sy lewe verloor om My ontwil, sal dit vind."

'n Parafrase van Mat 10:37-39

Projek KuberWêreld

Bereik die Wêreld met die Evangelie deur die digitale media

'n Projek van

Scripture Educational Programs

Die Evangelie word die wêreld ingestuur op die vlerke van die internet

Ons YouTube uitreike gedurende Julie

Die bostaande drie videos is gebruik vir uitreike gedurende Julie. Die teikenvelde vir elke video is aangepas vir die boodskap wat ons wil oordra. Met innige dankbaarheid teenoor die Here kan ons berig dat die video, How To Find God’s True Purpose For Your Life, 19,232 besoeke ontvang het; die video Artificial Spirituality het 15,656 besoeke ontvang; terwyl Four Criteria To Know Who God Is And Where To Find Him, 96,020 besoeke ontvang het. (Hierdie video se besoeke is steeds besig om geweldig te groei. 'n Totaal van 206,639 besoeke word reeds deur YouTube aangedui. Dit is deels te wyte aan ons medewerker(s), wat met dieselfde video uitreik op Facebook. Sien verderaan.)

Aan die Here al ons dank en eer! Dankie aan elke finansiële- en gebedsondersteuner wat dit help moontlik maak. Bid asseblief dat die saad wat gesaai is in harte sal ontkiem en groei.

Is dit moeiliker om ‘n ongeredde godsdienstige ‘christen’ tot redding te lei as iemand van ‘n ander godsdiens?

Die video, Artificial Spirituality, gaan oor die gevaar van vormgodsdiens. Hierdie boodskap is eintlik meer van toepassing op die Christelike as die nie-christelike wêreld. Daarom was ons teikenveld vir hierdie video hoofsaaklik die dominant Rooms Katolieke lande. Die lande wat ons met hierdie video geteiken het was, Argentinië, Oostenryk, België, Brasilië, Chile, Colombië, Costa Rica, Ecuador, Frankryk, Guatemala, Honduras, Indonesië, Italië (hoop die Pous het ook daarna gekyk), Jamaica, Mexico, Panama, Philippyne, Puerto Rico, Paraguay, El Salvador, Uruguay en Venezuela.

Hierdie video het opmerklik minder besoeke ontvang vir dieselfde begroting as die ander twee videos hierbo. Wat kan mens hieruit aflei? Is dit moeiliker om ‘n ongeredde godsdienstige ‘christen’ tot redding te lei as iemand van ‘n ander godsdiens? Dit wil voorkom of daar ‘n groter weerstand teen die ware Evangelieboodskap bestaan onder vormgodsdienstige ‘christene’. Is dit dalk ‘n rede vir die agteruitgang van die Evangelie in tradisioneel Christelike lande?

Dankie aan elkeen wat meewerk om die Evangelie die wêreld in te dra op Facebook

Dankie aan Nita Orsmond en Adriaan Fourie wat gedurende Julie gehelp het om die Evangelie uit te stuur na die mins-geëvangeliseerde wêreld op Facebook. ‘n Totaal van 128,888 mense het ons advertensies op Facebook gesien, waarvan 4,630 op die skakels na die videos geklik het. Aan die Here al ons dank en eer!

Die skakels na Nita Orsmond en S.T.A.D. bediening, en Adriaan Fourie en Southern Africa Truckers Ministry is op die fotos van hulle Facebookblaaie hierbo.

As jy, julle bediening of gemeente belangstel om ons te help met die uitstuur van die Evangelie na die wêreld op Facebook, kontak my asseblief by die eposadres hieronder.

Ons grootste uitdaging: Om die Evangelie strategies die wêreld in te stuur

Ek het hierdie afgelope maand opnuut onder die indruk gekom van die toenemende omsigtigheid waarmee ons voortaan die Evangelie die wêreld sal moet instuur. Die wêreld raak al hoe meer onverdraagsaam teenoor die suiwer Evangelie van Jesus Christus, terwyl ‘n afgewaterde en valse evangelie besig is om al hoe meer toe neem.

Facebook en ander media opdateer hulle reëls en regulasies op ‘n aaneenlopende basis om aan te pas by die wêreld se standaarde van ‘geregtigheid’. Soos reeds in die verlede berig, het Facebook my advertensierekening gesluit omdat my Evangelie uitreikboodskappe mense van ander gelowe ‘aanstoot’ gegee het. Ek kon nog nooit regtig vasstel wat die presiese beswaar was teen my uitreikboodskappe nie, totdat ek ‘n ander kind van die Here wat betrokke is met digitale tegnologie ontmoet het. Sy naam is Angelo Bernardi en hy bedryf ‘n digitale media onderneming, Bernardi Media. Ek het met Angelo gepraat oor digitale Evangelie uitreiking en hy het my geantwoord met ‘n baie insiggewende boodskap. Ek haal enkele gedeeltes aan:

“The moment they (Facebook) see that your profile is violating their terms, they shut everything down. .... it depends how that Christian content is presented, because if it goes for manual review and they check and they see where you're targeting and it's not appropriate for the audience that you're targeting ... the ad can be reported. ... Maybe one has to do this tactfully and be aware of what post you are advertising. If you're going to post about the crucifixion of Jesus, it will be banned. I can guarantee you that; and the clause or the part that they're going to use to ban it is, ‘you're promoting violence’. So one has to be strategic. ...”

As jy, jou gemeente, of besigheid hulp soek met webblad ontwikkeling, kontak gerus vir Angelo by Bernardi Media.

Toe ek ‘n uitreikboodskap op Facebook nie moes ‘ge-like’ het nie

Die wêreld is besig om te verander en die geheim wat ons moet aanleer is om die Evangelie ‘strategies’ die wêreld in te stuur. Een van die foute wat ek hierdie afgelope maand gemaak het was om ‘n pos van een van ons videos wat gebruik word vir ‘n promosie-uitreik na die ongeëvangeliseerde wêreld op ‘n medewerker se Facebookblad te ‘like’.

My eerste gedagte was dat dit sal bydra om andere aan te moedig om daarna te kyk. Maar toe ek weer daaroor nadink besef ek dat Facebook se KI kruipers my identiteit kan koppel deur die ‘like’ aan my ‘verbande/gemerkte’ advertensieprofiel, wat daartoe kan lei dat die promosie wat nie-christelike lande teiken, gemerk word.

Ons vra asseblief dat julle vir ons sal bid vir wysheid, en dat die Here die oë van ons teenstanders sal verblind soos Elisa gebid het dat die Here die Arameërs met blindheid sal slaan, om vrye toegang vir die Evangelie te verseker tot aan die uiteindes van die wêreld.

Die tegnologie kry mens soms onder

Ek vra om verskoning vir die skakels na die onderstaande twee videos wat in verlede maand se nuusbrief privaat gepubliseer was en nie gewerk het nie. Ek het nou die wysigings wat ek wou aanbring gedoen en die videos vir die publiek gepubliseer.

Ses misverstande wat veroorsaak dat Christene en gemeentes God se primêre doel en plan vir hulle lewens mis

Die onderstaande artikel is ‘n uittreksel uit ‘n boekie wat ek reeds in 2012 geskryf het. Ek vertrou dat dit vir jou tot seën sal wees.

God het 'n heerlike en hemelse doel en roeping vir jou lewe as Christen hier op aarde!

Behalwe vir die hemel, het God 'n wonderlike plan en doel vir jou as Sy kind hier op aarde! Dis hoekom Hy jou Sy kind gemaak het! God het jou Sy kind gemaak met 'n baie spesifieke doel, plan en roeping in gedagte, en Hy het 'n begeerte in jou hart ingeplant om hierdie doel en roeping vir jou lewe te vind. Daarom sal jy slegs ware en blywende vervulling in jou Christelike lewe ervaar wanneer jy hierdie doel en roeping vind en leef!

Hierdie doel is egter gladnie wat baie Christene dink nie! Laat ons 'n paar algemene misverstande uit die weg ruim.

God het jou nie primêr Sy kind gemaak om eendag hemel toe te gaan en jou van die hel te red nie.
God het jou nie primêr Sy kind gemaak om aan jou nuwe aardse waardes en aardse lewensdoel te gee nie.
God se doel vir jou lewe hier op aarde is nie primêr om van hierdie wêreld 'n beter plek te maak nie.
God se doel vir jou lewe hier op aarde is nie primêr om God se ‘liefde’ in hierdie wêreld uit te dra nie.
God se doel vir jou lewe hier op aarde is nie primêr vir jou en jou gesin se materiële welstand nie.
God se doel vir jou lewe hier op aarde is nie primêr om 'kerk' toe te gaan en by 'die kerk' betrokke te wees nie.

Dit beteken nie dat die bogenoemde doelwitte nie ook waar en geldig is nie, maar dit staan sekondêr tot God se primêre skeppingsdoel en roeping vir jou lewe. Daar is nog veel meer wat ons kan opnoem. As een of meer van bogenoemde punte die primêre doel van jou Christenskap is, is jy besig om God se hoogste doel vir jou lewe te mis!

Jesus Christus het jou Sy kind gemaak vir 'n heerlike doel, en hierdie doel is baie hoër as wat meeste Christene besef! Jy sal nooit jou doel as Christen in hierdie lewe vind vir solank jou visie op die aarde is nie!

Lig jou oë hoër! Kyk op na die wolke! Lig jou ken! Mik hoër!

Die wederkoms van Jesus Christus is die finale vervulling van God se plan vir die Kerk en elke Christen.

Jesus Christus het jou Sy kind gemaak omdat Hy met Sy wederkoms met jou wil trou! Dis geen grap nie! In Op19:7 lees ons: "Laat ons bly wees en ons verheug en aan Hom die heerlikheid gee, want die bruilof van die Lam het gekom en sy vrou het haar gereed gemaak." Jesus Christus wil in 'n heilige eg met jou verbind wees! Jesus Christus wil in 'n geestelike huweliksverhouding met jou staan! Hy wil jou deel van Sy Bruid maak!

As jy deel van die Bruid is wil Hy jou gebruik om Sy Bruid te help versamel uit die nasies -- want Sy Bruid sal met Sy wederkoms verteenwoordig word deur elke volk, stam en taal in die wêreld. Op 5:9: “U is waardig om die boek te neem en sy seëls oop te maak, want U is geslag en het ons vir God met u bloed gekoop uit elke stam en taal en volk en nasie, ..”

Die skeppingsdoel van God is om 'n Bruid en nageslag vir Jesus Christus te verwek uit elke volk, stam en taal, om in ewigheid saam met Hom te regeer oor die skepping!

Dit is die rede waarom die bereiking van elke volk, stam en taal, en die voltooiïng van Jesus se Groot Opdrag die Kerk en elke Christen se hoogste doel en prioriteit moet wees.

Ons glo dat die digitale eeu waarin ons leef deur God bestem is om Sy Kerk se afspraak met die nasies te help volbring en dat Hy elke Christen oproep tot betrokkenheid! As jy wil weet hoe jy en jou gemeente deel van hierdie doel van God kan wees, volg hierdie skakel.

Hier kan jy meer lees oor die geheim om God se plan en roeping vir jou lewe te vind: Hoe Om Jou Ware Doel En Roeping In Die Lewe Te Vind - Deel 3.

Klim saam met ons op die Bereik Die Wêreld vlug na die uiteindes van die aarde deur digitale media

Sal jy en jou gemeente saam met ons op die Bereik Die Wêreld vlug klim na die uiteindes van die aarde? Sal jy deur gebed, digitale uitreiking, of finansiële ondersteuning betrokke raak by hierdie groot visie? 'n Gereelde maandelikse bydrae van so min as R100, kan soveel as 1,700 mense per jaar met die Evangelie bereik. Klik op die foto vir ons bankbesonderhede.

Baie dankie

Baie dankie aan elke persoon of gemeente wat op een of ander manier vir Projek KuberWêreld help om die Evangelie uit te dra na al die nasies. Baie dankie aan elke medewerker wat betrokke is in gebedsondersteuning, finansiële ondersteuning, digitale uitreiking, of mobilisering. Mag die Here u ryklik seën!

Indien u of u gemeente ‘n bydrae wil maak, volg die skakel na ons bankbesonderhede.