Die balk is in die verkeerde oog

Ek is tans besig met die produksie van 'n video met Matteus 7:3-5 as tema en het Kunsmatige Intelligensie gevra om vir my 'n beeld te skep met hierdie teksvers as beskrywing. Die beeld hierbo was die resultaat -- maar die balk is in die verkeerde persoon se oog. 

Om Matteus 7:3 te illustreer het ek ook vir die KI program gevra om vir my 'n beeld te skep van 'n dokter wie se kop en oë toegebind is met 'n verband, wat 'n pasiënt ondersoek met 'n stetoskoop. Maar hoe ek ookal probeer het om te verduidelik dat die dokter se oë moet toegebind wees maar nie die pasiënt s'n nie -- en ek het verskeie pogings aangewend -- kon die KI program nie die regte beeld produseer nie. 

Hieronder is drie van die prentjies wat die program vir my geskep het, maar in elke prentjie is daar 'n verband om die pasiënt se kop en in twee van die beelde is die pasiënt se oë toegebind in plaas van die dokter s'n. 

Die storie vervolg onder ...

Die Evangelie vlieg op digitale vlerke na die uiteindes van die aarde

Dit is weereens met innige nederigheid en dankbaarheid teenoor die Here dat ons kan berig dat ons YouTube-kanaal so pas die 900,000 besoeke merk verbygesteek het. 

Dit is belangrik om te benadruk dat ons gebeds- en finansiële ondersteuners hierdie resultate moontlik gemaak het deur ons in staat te stel om die digitale media te hefboom met betaalde advertensies en gebed. Aan die Here al die eer! 

Ons reik uit na die mins-geëvangeliseerde wêreld deur Facebook 

Met Nita Orsmond en haar S.T.A.D. bediening se hulp het ons gedurende Februarie die volgende lande deur Facebook met die Evangelie geteiken: Indië, Nigerië, Indonesië, Pakistan, Bangladesh, Egipte, Turkye, Filippyne, Iran, Vietnam, Thailand, Myanmar, Suadi Arabië, Malaysia en Algerië. Meer as 72,000 mense is bereik deur die advertensies, terwyl daar 1,624 reaksies was.

Bid asseblief ook vir Nita en haar bediening. Die vyand probeer om haar uitreike na die ongeëvangeliseerde wêreld met bedrog te keer. Maar ons is aan die oorwinningskant saam met elke ondersteuner in gebed!

Digitale Evangelie Uitreik Opleidingsprogram – vir gemeentes, bedieninge en individue

Ek het in verlede maand se nuusbrief berig oor hierdie projek waarmee die Here my belas het. Soos ook reeds berig, is hierdie vir my 'n groot uitdaging op hierdie stadium van my lewe, maar ek vertrou die Here vir spesiale krag, genade en wysheid. Die projek vorder, maar teen 'n stadiger pas as wat ek graag sou wou. Ek wil hiermee net weer 'n beroep doen om asseblief spesiaal vir my en hierdie projek te bid. By voorbaat dankie vir u gebedsondersteuning.

Die balk is in die verkeerde oog - vervolg

Eintlik het die KI program my boodskap volmaak geïllustreer. 

Daar is geen data beskikbaar wat Kunsmatige Intelligensie kon gebruik om die beskrywing wat ek gevra het, te illustreer nie. Die Bybel is die enigste Bron -- en dit is slegs die Heilige Gees wat dit aan 'n hart kan openbaar!

Ek wou die punt illustreer dat elke mens van nature altyd die sonde van andere eerste raaksien voor sy eie. Die 'balk' waarvan Jesus praat in Mat 7:3-5 is niks anders as die mens se sondige natuur nie -- en dit is nie slegs sommige mense wat 'n balk in die oog het nie! Elke mens word geestelik blind gebore.

Die sondige natuur van die mens identifiseer altyd die probleem buite homself. Ons kry talle voorbeelde hiervan in die Bybel, vanaf Adam wat vir Eva die skuld gegee het en Eva wat vir die slang die skuld gegee het, tot Dawid wat die profeet Natan nodig gehad het om sy 'balk' uit te wys. Van nature is die mens selfgesentreerd en eiegeregtig. Elkeen van ons word met 'n 'balk in ons eie oog' gebore. Van nature is elke mens op aarde 'n gebore Fariseër.

Daarom is die Evangelie van Jesus Christus die enigste oplossing vir die mens se sondeprobleem. Die boodskap van die Evangelie eindig nie wanneer ek sekerheid van redding ontvang het nie -- dit begin slegs daar. Die wonder van die Evangelie is dat dit ook die oplossing bevat vir die kruisiging van my sondige natuur en die 'balk' in my oog, wat geen kunsmatige intelligensie (of -spiritualiteit) kan namaak nie!

Die 'balk' in my oog (wat ek nie raaksien nie) is die fundamentele rede vir oppervlakkige Christenskap en vormgodsdiens in die kerk. Die 'balk' in my oog is die fundamentele rede vir verdeeldheid onder Christene. Die 'balk' in my oog is die fundamentele rede vir gebrek aan visie vir 'n verloregaande wêreld. En ...

Die 'balk' in die oog van die Kerk van Jesus Christus is die fundamentele rede waarom elke volk, stam en taal nog nie met die Evangelie van Jesus Christus bereik is nie!

Wat is die oplossing vir die 'balk in my oog'? Die oplossing word vir ons netjies saamgevat in Romeine 12:1,2: "En nou doen ek 'n beroep op julle, broers, op grond van die groot ontferming van God: Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen. Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is." (NAV) 

Vir verdere inligting, kyk gerus na ons videos, 'The Secret Of God's Purpose - Part 4' en 'The Secret Of God's Purpose - Part 5', of besoek ons Afrikaanse webblad, 'Die Geheim van ‘n Oorvloedige, Doelgerigte Lewe'.

Klim saam met ons op die trein na die uiteindes van die aarde deur digitale media

Sal jy saam met ons op die trein klim na die uiteindes van die wêreld? Sal jy deur gebed, digitale uitreiking, mobilisering, of finansiële ondersteuning betrokke raak by hierdie groot visie? 'n Gereelde maandelikse bydrae van so min as R100, kan soveel as 1,700 mense per jaar met die Evangelie bereik. Klik op die foto vir ons bankbesonderhede.

Baie dankie

Belangrike skakels

Lees-meer skakels