Projek KuberWêreld -- Nov/Des 2023

Published: Tue, 12/05/23

Projek KuberWêreld

Bereik die Wêreld met die Evangelie deur die digitale media

'n Projek van

Scripture Educational Programs

Nov/Des 2023 Nuusbrief

Wees gegroet in die aloorwinnende Naam van Jesus Christus

Liewe vriende, die nuusbrief wat ek verlede week uitgestuur het, het verkeerde skakels op die videos hieronder gehad. Jammer vir die fout. (Die tegnologie kry my soms onder.) Dit is reggestel in hierdie weergawe.

Op 14:6: “En ek het ‘n ander engel in die middel van die lug sien vlieg met ‘n ewige evangelie om te verkondig aan die bewoners van die aarde en aan alle nasies en stamme en tale en volke.”

“Earth Has Received a Message Laser-Beamed From 10 Million Miles Away”

Die tegnologiese revolusie van ons dag is besig om teen so ‘n geweldige tempo te ontplof dat ‘n mens skaars kan byhou. Op 23 November het die bostaande nuus gebreek: Earth Has Received a Message Laser-Beamed From 10 Million Miles Away.

In ons eerste nuusbrief van hierdie jaar het ek berig oor die opkoms van Kunsmatige Intelligensie en 'n nuwe webblad wat pas gepubliseer was, wat aan die algemene publiek gratis toegang gee tot die grootste Kunsmatige Intelligensie netwerk wat nog ooit geloods is, genaamd, OpenAI.com.

Hierdie gebeurtenis het aanleiding gegee tot die geboorte van Projek Kuberwêreld se YouTube videokanaal, waar ons gebruik maak van Kunsmatige Intelligensie om die klankbaan te produseer, waarvan die videoteks vertaal en gelees kan word in enige een van 133 tale met die druk van ‘n knoppie.

Ons YouTube-kanaal het gedurende November die 700,000 besoeke-merk oorskry. Aan die Here al die eer!

Toe ek die bostaande nuusberig sien, gaan my gedagtes outomaties na die Onbereikte Wêreld. (Ek het ‘n ‘one-track mind’ vir die Onbereikte Wêreld.) Terwyl die wêreld reeds tot in die buitenste ruimte met mekaar kommunikeer, sukkel die Kerk nog om die Evangelie toeganklik te maak vir 'n derde van die aarde se bevolking. Waarom? Ons het hierdie vraag in verlede maand se nuusbrief beantwoord.

Die Here het aan die Kerk die tegnologie gegee het om die Onbereikte Wêreld met die Evangelie te bereik. Die vraag is, gebruik ons die geleenthede tot ons beskikking ten volle om die taak te volbring?

Ons is nog steeds opsoek na individue, bedieninge en gemeentes wat met Projek KuberWêreld wil saamwerk om die Evangelie deur middel van Facebook na die mins-geëvangeliseerde wêreld te stuur.

Iemand het die stem van die Here gehoor en word deur die Here gebruik as Sy instrument

Nita Orsmond van S.T.A.D. Bediening het die geleentheid aangegryp en is besig om, benewens haar eie bediening, in samewerking met Projek KuberWêreld die Evangelie deur middel van Facebook die wêreld in te stuur. Binne EEN dag het sy reeds 5,310 persone met die Evangelie bereik waarvan 86 op die uitreikskakel geklik het. Ek het die volgende boodskap van haar ontvang na die eerste dag:

"Goeiemôre Elmer. Hierdie 👆is Malawi. Het met 17 persone die evangelie gedeel. Een persoon het Jesus Christus aanvaar, gaan nou vir hom inligting aanstuur rakende die Nuwe Lewe in Christus. Die ander land is Libia - nog net 18 mense bereik."

Nita se S.T.A.D. Bediening behels persoonlike uitreike; Facebook en internet evangelisasie; epos bediening; oordenkings op WhatsApp; gebedsgroep wat fokus op redding van siele; Bybelstudies; berading en nog meer. Sy kan gekontak word per foon by 064-506-0135 of per epos by myministad@gmail.com. Hier is die skakel na haar Facebookblad.

Met haar vol program sou ek nie gedink het dat sy nog sou kans sien vir 'n Projek KuberWêreld uitreik nie. Maar dit bevestig maar net weer hierdie wyse stelling:

"The only ability required by God for His service, is availability!"

Die bostaande getuienis kan ook jou en julle gemeente se getuienis word. Die enigste vereiste is beskikbaarheid -- met 'n rapsie van jou tyd.

Nuwe videos op YouTube gepubliseer

Projek KuberWêreld het gedurende November die onderstaande nuwe videos gepubliseer: “How To Find Salvation In Jesus Christ”, “And Then”, en “The Heavenly Marriage.” Hierdie drie videos het gedurende November meer as 29,000 besoeke ontvang.

Nuwe Google uitreik

Ons is dankbaar om te kan berig dat ons ook weer op Google ‘n nuwe uitreikveldtog kon begin wat tot einde Desember sal loop. Ten tye van publikasie van hierdie nuusbrief het 145 persone ons 'Finding Purpose And Meaning' webblad besoek, waarvan 4 persone deurgeklik het na die sondaarsgebed.

Wanneer die Here jou kandelaar wegneem ...

Terwyl ek besig was om op die Here te wag vir die inhoud van hierdie nuusbrief, het ek tot 'n skokkende ontdekking gekom. Die Here lei my na 'n artikel wat ek in 2017 geskryf het met die titel, Hoe Om Die Stem Van God Te Hoor. Die artikel gaan oor ‘n boodskap wat ek gehoor het wat my diep geraak het. Behalwe vir die boodskap, het ek die stem van God gehoor! Die teks van oordenking was Op 2:4,5: "Maar Ek het teen jou dat jy jou eerste liefde verlaat het. Onthou dan waarvandaan jy uitgeval het, en bekeer jou en doen die eerste werke. Anders kom Ek gou na jou toe en sal jou kandelaar van sy plek verwyder as jy jou nie bekeer nie."

Terwyl ek nou weer hierdie artikel lees, besef ek dat die waarskuwing van Op 2:4,5 waaroor hierdie artikel gaan, ‘n paar maande na die oorspronklike skrywe oor my gesin in vervulling gegaan het. Die Here het die kandelaar van ons gesin verwyder toe my huwelik en ons gesin verbrokkel het. Ek het nooit besef toe ek hierdie artikel geskryf het, dat dit so ‘n letterlike profetiese impak sou hê nie. Dank God dat Hy nie die kandelaar van my bediening verwyder het nie!

Ek sien egter dat die verwydering van die kandelaar in vervulling gegaan het (en besig is om te gaan) in die lewens van menige Christene, gemeentes en bedieninge reg rondom my -- meesal sonder dat hulle dit besef!

Wat is jou kandelaar?

Wat is die kandelaar waarvan Op 2:4,5 praat? Die Nuwe Vertaling gebruik die woord, 'lamp' i.p.v. 'kandelaar'. Dit is nie jou redding nie -- dit is jou getuienis. Dit is jou Goddelike lewensdoel. Dit is jou hemelse en Christelike roeping hier op aarde. Dit is waarvoor God jou wil gebruik in hierdie wêreld. Die Here het ‘n spesiale en unieke Koninkryksroeping vir elkeen van Sy kinders en vir elke gemeente — dít is jou en jou gemeente se kandelaar of lamp!

Hoe om die stem van God te hoor

Staan jy of jou gemeente se kandelaar op die punt om weggeneem te word? Het jy of jou gemeente julle getuienis verloor? Is jy nog bruikbaar en vrugbaar in diens van God? Is jy op die plek waar die Here jou wil en kan gebruik om die wêreld met die Evangelie te bereik?

Hoor jy en jou gemeente nog die stem van die Here? Ek nooi jou hiermee om die artikel, 'Hoe Om Die Stem Van God Te Hoor', te lees by hierdie skakel.

Klim saam met ons op die trein na hierdie Een Ding

Sal jy saam met ons op die trein klim na die uiteindes van die wêreld? Sal jy deur gebed, digitale uitreiking, mobilisering, of finansiële ondersteuning betrokke raak by hierdie groot visie? 'n Gereelde maandelikse bydrae van so min as R100, kan soveel as 1,700 mense per jaar met die Evangelie bereik. Klik op die foto vir ons bankbesonderhede.

Baie dankie

Baie dankie aan elkeen wat op een of ander manier vir Projek KuberWêreld help om die Evangelie uit te dra na al die nasies. Baie dankie aan elke medewerker wat betrokke is in gebedsondersteuning, finansiële ondersteuning, digitale uitreiking, of mobilisering. Mag die Here u ryklik seën!

Indien u of u gemeente ‘n bydrae wil maak, kan u die skakel na ons bankbesonderhede hieronder vind.