Digitale Evangelisasie — die grootste geleentheid ooit!

Deur die tegnologie te hefboom met behulp van promosie tegnieke, kan ons die Evangelie van Jesus Christus uitstuur na die uithoeke van die wêreld. Die Here het vir die Kerk 'n deur oopgemaak vir die Evangelie na die uiteindes van die aarde. Mag Hy ons getrou bevind om die geleentheid tot ons beskikking ten volle te benut.

Terselfdertyd ondervind ons die teenstand van die sielevyand, wat elke moontlike hindernis in ons pad wil plaas om hierdie doel te vernietig. Sedert ek met hierdie bediening besig is, het ek ondervind dat dit 'n intense geestelike oorlog is, en die intensiteit van hierdie oorlog raak al hoe veller hoe nader ons aan die wederkoms van Jesus Christus beweeg. Maar prys die Here: Hy hou die sleutel -- Hy sluit oop en niemand sluit nie, en Hy sluit en niemand maak oop nie. (Op 3:7,8)

Ons YouTube-bediening

Soos reeds voorheen berig, het die YouTube-bediening sy ontstaan vroeër hierdie jaar te danke gehad aan die feit dat Facebook ons advertensierekening gesluit het. Die YouTube-bediening is gebore uit ‘n desperate situasie, waar dit gelyk het of Projek KuberWêreld se bediening tot ‘n einde gekom het. 

Dit is net wonderlik wanneer mens die Here se hand in jou negatiewe omstandighede raaksien. Die Here het juis die Facebook-toedeur gebruik om die YouTube deur oop te maak. Prys die Here! Hierin lê ‘n groot les opgesluit waaroor ek ‘n hele boodskap kan skryf, maar ek dink jy sien reeds die prentjie. Mag dit ook vir jou in jou negatiewe omstandighede ‘n bemoediging wees.

In diepe verootmoediging teenoor die Here kan ek berig dat ons YouTube-kanaal met datum van skrywe die 460,000 besoeke-merk verbygesteek het. Die video, ‘Why God’s World Is Not A Democracy’, het tot op datum meer as 28,000 besoeke in drie weke gehad. Aan die Here al die eer!

Ons Facebook-bediening

In 'n vorige nuusbrief het ek berig oor ons samewerking met Ds Chris Visser en sy bediening, Koninkryksfokus; en die nuwe deur wat die Here vir ons op Facebook oopgemaak het om die Evangelie die wêreld in te dra. Soos ek hierbo gesê het, is ons in 'n geestelike oorlog gewikkel en staan die Satan ons werk met alle mag teë. 

'n Paar dae gelede het ek 'n nuwe veldtog na 26 lande in Noord-Afrika op Facebook geloods en die resultate het net begin wys, toe Facebook na ongeveer vyf ure die veldtog skielik stop. Ons veldtog het gedurende sy eerste vyf uur reeds 1,274 persone bereik, waarvan 91 op die skakel na die Evangelieboodskap geklik het. My eerste reaksie was, Facebook het my nou alweer opgespoor en is besig om my te vervolg. Kort daarna is al Koninkryksfokus se Facebookblaaie gesluit, Ds Chris se bankrekening (waarheen ons ook fondse oorbetaal) is leeg getrek, en het dit aan die lig gekom dat daar 'n aanslag van korrupsie was. Ons vra jou ernstige voorbidding vir oorwinning in die stryd en vir beide ons Facebookbedieninge -- dat die Here weer spoedig die deure vir ons sal oop maak.

My droomwêreld

Vergewe my, maar ek is 'n (dag)dromer. Ek droom gedurig dat die Kerk van Jesus Christus die hele wêreld met die Evangelie bereik. Die Here het Josef se drome tot vervulling gebring -- en Hy gaan myne ook tot vervulling gebring! (Jesus het klaar so gesê in Han 1:8.) Sê nou net, nog 'n paar mense, gemeentes of aksies stel hulle Facebookblaaie tot beskikking van die Here, en ons kan uitreikveldtogte aanmekaar laat loop. Teoreties gesproke, kan ons minstens 250 persone per uur op Facebook met ons veldtogte bereik, waarvan minstens 18 persone per uur die Evangelieboodskap lees. Dit beteken dat ons meer as 2 miljoen mense per jaar met ons veldtogte kan bereik, waarvan meer as 150,000 die Evangelieboodskap lees. Sê nou maar net ...!!

Die volgende stelling op Global Media Outreach se webblad het my aangegryp:

Every day, more than 5.16 billion people spend almost 7 hours on the Internet searching for answers, comfort, and distraction. Global Media Outreach meets people online in their time of need to share the eternal hope found in relationship with Jesus.

Ons Google-bediening

Die Here het my gelei om hierdie afgelope maand die moontlikheid te ondersoek om ‘n Google advertensieprojek te loods. Die rede waarom ek nog nooit voorheen op Google geadverteer het nie, is omdat dit baie duurder is om dieselfde resultate te verkry as op Facebook en YouTube. Nadat ek gesien het dat Global Media Outreach 50% van hulle advertensiebegroting op Google investeer, het ek nader ondersoek gaan instel. 

Ek het besef dat daar ‘n verskil is in die doelwitte wat ons op Facebook en YouTube, en Google bereik. Op Facebook en YouTube versprei ons die Evangelie so wyd en ver as moontlik. Op Google bereik ons hoofsaaklik soekendes, wat ‘n klein minderheid is. Die persone wat op Google op ons advertensies klik is persone wat ‘n spesifieke soekfrase op Google volg, byvoorbeeld, ‘meaning of life’. Met ander woorde, hulle wat op ons advertensies klik, is meesal soekend. Gedurende die eerste veertien uur, het 103 persone ons uitreikblad, Finding Purpose And Meaning (hierbo), besoek. Hierdie veldtog sal, so die Here wil, vir die volgende maand aanmekaar loop. Ek vra voorbidding ook vir hierdie projek asseblief. Hierdie projek het sy eie uitdagings.

Belangrike Bybelse waarhede m.b.t. geestelike vrugbaarheid

Voor in my Bybel is daar kopieë van drie artikels wat vir my baie in my geestelike lewe beteken het meer as dertig jaar gelede, toe ek na die Here se wil, plan en roeping vir my lewe gesoek het. Ek het later besef dat hierdie waarhede van fundamentele belang is om vrugbaar in diens van die Here te staan en deur Hom gebruik te word. 

Die eerste artikel se titel is, ‘n Dieper Dood Aan Self’, deur G D Watson. Toe ek hierdie artikel nou weer lees, was die boodskap vir my nog net so kragtig as vyf-en-dertig jaar gelede. Ek het intussen die oorspronlike artikel in Engels op die internet opgespoor – sonder kopiereg – en dit is die onderwerp van my volgende video op YouTube. Ek vertrou om in volgende maand se nuusbrief die skakel te kan deurgee.

Verdeeldheid is een van die grootste oorsake dat die Heilige Gees geblus word in die Kerk van Jesus Christus

Een van die ander artikels in my Bybel wat ek na meer as dertig jaar weer gelees, en net so tot seën gevind het, is die onderstaande – Die Onkritiese Gees. Ek publiseer dit graag in hierdie nuusbrief. (Dit kom uit ‘n Afrikaanse weergawe van een of ander dagstukkie boek, maar ek kan gladnie meer onthou wie die outeur of die naam van die boek was nie. Miskien is daar iemand wat hier lees wat my daarmee kan help.)

Die Onkritiese Gees

“Moenie oordeel nie, sodat julle nie geoordeel mag word nie.” Mat 7:1.

Met betrekking tot oordeel sê Jesus – Moenie. Die gemiddelde Christen is die mees deurtastende kritikus. Kritiek is 'n onderdeel van die gewone menslike vermoëns, maar in die geestelike wêreld rig dit niks uit nie. Die uitwerking van kritiek is om die kragte van die gekritiseerde te verbrokkel. Die Heilige Gees is die enigste Een wat in 'n juiste posisie is om te kritiseer; alleen Hy is in staat om aan te dui wat verkeerd is sonder om seer te maak of te verwond. As jy in 'n kritiese luim is, is dit altyd onmoontlik om met God in gemeenskap te tree; dit verhard jou en maak jou wraaksugtig en wreed en laat jou onder die vleiende indruk dat jy 'n meerderwaardige persoon is. Jesus sê -- as 'n dissipel moet jy 'n onkritiese gees aankweek. Dit geskied nie eens en vir altyd nie. Pasop vir enigiets wat jou die plek van a meerderwaardige persoon laat inneem.

Van die skerpsinnigheid van Jesus kom 'n mens nie weg nie. As ek die splinter in jou oog sien, dan beteken dit dat daar 'n balk in myne is. Elke verkeerde ding wat ek in jou sien, bring God by myself tuis. Elke keer as ek oordeel, veroordeel ek myself.¹ Hou tog nie langer 'n meetstok vir ander mense gereed nie. In elke mens.se omstandighede is daar altyd nog iets waarvan ons niks weet nie. Die eerste wat God doen, is om ons 'n deeglike geestelike skoonmaak te laat ondergaan; na so iets is daar nie die minste moontlikheid vir enige hoogmoed om in 'n mens oor te bly nie. Ek het nog nooit iemand teëgekom aan wie ek gewanhoop het, nadat ek gesien het wat daar in my skuil as dit nie was vir die genade van God nie.

¹ Sien Rom 2:17-20

Klim saam met ons op die trein na hierdie Een Ding

Sal jy saam met ons op die trein klim na die uiteindes van die wêreld? Sal jy deur gebed, digitale uitreiking, mobilisering, of finansiële ondersteuning betrokke raak by hierdie groot visie? 'n Gereelde maandelikse bydrae van so min as R100, kan soveel as 1,700 mense per jaar met die Evangelie bereik. Klik op die foto vir ons bankbesonderhede.

Baie dankie

Belangrike skakels

Lees-meer skakels