Die wêreld het vanaf Desember 2022 onherroeplik verander!

Liewe vriende, ek stuur hierdie nuusbrief reeds vandag uit in plaas van die einde van Januarie, vir die eenvoudige rede dat dinge besig is om so vinnig te verander dat hierdie nuusbrief teen die einde van die maand reeds verouderd kan wees. Verskoon die baie fotos wat moontlik kan veroorsaak dat die nuusbrief stadig oopmaak, maar dit is onvermydelik.

xxx

xxx

xxx

Gedurende Desember is 'n nuwe webblad gepubliseer wat aan die algemene publiek gratis toegang gee tot die grootste Kunsmatige Intelligensie netwerk wat nog ooit geloods is, genaamd, OpenAI.com. Die potensiaal van hierdie toepassings laat 'n mens na jou asem snak. Een van die toepassings wat beskikbaar is, is ChatGPT. Jy kan vir ChatGPT haas enige vraag vra of opdrag gee, en hy(?) sal dit vir jou antwoord of uitvoer. Ek noem 'hom' Charlie.

Kenners is dit eens dat KI die wêreld onherroeplik sal verander. KI sal waarskynlik miljoene mense regoor die wêreld se werk oorneem en hulle sal hulle werk verloor. (Terloops, 'n maand na sy publikasie, het die ChatGPT webblad ineengestort weens die geweldige reaksie regoor die wêreld, maar was vinnig weer op dreef.)

Kan Charlie ons help om die wêreld met die Evangelie te bereik?

My belangstelling in Charlie het te doen met die vraag of hy ons kan help om die wêreld met die Evangelie te bereik. Ek het die afgelope paar jaar verskeie artikels geskryf oor die groot deur wat die Here deur middel van die digitale media (internet en sosiale media) oopgemaak het vir die Evangelie na die onbereikte wêreld. Projek KuberWêreld se hele bediening is daarop gegrond. Soos u weet, het Facebook ons advertensierekening gesluit as gevolg van klagtes vanuit die Moslem-, Hindoe- en Boedistiese wêreld, nadat ons massas van hulle met die Evangelie bereik het met behulp van Facebook advertensies. Hou Kunsmatige Intelligensie vir ons enige voordeel in? Kom ons gaan stel bietjie nader ondersoek in.

Ek het vir Charlie gevra om my te help om hierdie nuusbrief te skryf.

Ek het vir Charlie gevra: "Please give me ideas for my newsletter about sharing the Gospel of Jesus Christ via digital media." Charlie het my in minder as 'n minuut so teruggeantwoord: "Sure, here are a few ideas for your newsletter about sharing the Gospel of Jesus Christ via digital media:" Hieronder is die gesprek. 

Ek het verder vir Charlie gevra: "Can you please write me a newsletter with the above ten points as basis." Charlie het my soos volg geantwoord, "Sure, here's a sample newsletter that incorporates the ideas I mentioned earlier", en in minder as 'n minuut het Charlie vir my 'n hele nuusbrief geskryf. (Nie hierdie een nie.)

Kan Charlie die werk van die Kerk oorneem? 'n Skokkende gevolgtrekking!

Ek het vir Charlie nog 'n paar vrae gevra en het tot 'n skokkende gevolgtrekking gekom. Kunsmatige Intelligensie kan die werk van die Kerk oorneem -- met een uitsondering -- die werk van die Heilige Gees! Die skokkende werklikheid is dat die kerk (met 'n klein letter) kan voortleef op KI sonder die Heilige Gees.

Ek het verder vir Charlie vir voorstelle gevra vir 'n boodskap oor die onderwerp van redding in Jesus Christus vanuit die Bybel. Lees bietjie wat Charlie my geantwoord het:

Ek het verder vir Charlie gevra of hy die bogenoemde antwoord vir my kan vertaal in Afrikaans en sy antwoord was : "Natuurlik! ..." -- en daar was dit. (Terloops, hy het op my versoek dit ook in Japannees vertaal.)

Daarna het ek vir Charlie gevra om vir my 'n preek voor te berei met Joh 3:16 as teks. Hy het toe vir my eers 'n buitelyn gegee, waarop hy sou uitbrei en in Afrikaans vertaal het as ek hom sou gevra het:

Ek het daarna vir Charlie gevra: "How can I be saved and receive salvation?" en hy het my hieronder soos volg geantwoord: ... Merkwaardig! ... Charlie het nie alleen my vraag beantwoord nie, maar my ook in 'n sondaarsgebed begelei!

Die skokkende werklikheid  -- Kunsmatige Spiritualiteit (KS) in die Kerk van Jesus Christus

Dit is moontlik om al die regte antwoorde te ken -- maar steeds verlore te wees! Dit is moontlik om waarlik gered te wees, maar die Christelike lewe in eie krag te probeer leef. Dit is moontlik om al die regte dinge te preek -- maar sonder die krag van die Heilige Gees. Hoe sal ons weet of die preek waarna ons luister op 'n Sondag deur Charlie voorberei is of nie? Sal ons dalk in die toekoms na 'n robot op die kansel luister?

Dit bring my terug na die onderwerp van my vorige nuusbrief, naamlik geestelike doodsheid. Wat is die oorsaak van geestelike  doodsheid? Die antwoord is Kunsmatige Spiritualiteit (KS). Wat is Kunsmatige Spiritualiteit?

KS is teologie en prediking sonder die Heilige Gees; godsdiens sonder die Heilige Gees; lofprysing sonder die Heilige Gees; emosionele opwekking sonder die Heilige Gees; evangelisasie sonder die Heilige Gees; sendingwerk sonder die Heilige Gees. Alle Christelike aktiwiteit wat deur KS gedryf word lei na geestelike doodsheid.

Wat is die oorsaak van geestelike doodsheid? Die oorsaak is geestelike selfstandigheid, -selfgenoegsaamheid, -selftevredenheid, -selfbelang en alles wat met 'self' begin. Die oorsaak van geestelike doodsheid is 'ek kan dit self en in eie krag doen' -- dit is 'ek' en my selfgesentreerde natuur.

Wat is die oplossing vir geestelike doodsheid? Die oplossing is kruisiging van my 'eie-ek' en die oorname van die Heilige Gees in my lewe! Die groot vraag is, hoe kan die Heilige Gees Sy regmatige plek inneem in ons lewens, bedieninge en gemeentes? 'n Groot hoeveelheid boeke is al deur Godsmanne oor hierdie onderwerp geskryf, maar ek wil tog in alle nederigheid en afhanklikheid van die Heilige Gees poog om die antwoord in een paragrafie op te som:

Deur die Kruis -- deur in opregte verootmoediging, in berou en bekering van sonde en my sondige natuur, en in absolute onvermoë om God te behaag en te dien met my natuurlike vermoëns en krag; in algehele geloofsoorgawe te kom kniel by die Kruis en God te vertrou om my te reinig, te heilig en te vul met Sy Heilige Gees; en dan daagliks deur die Kruis in gehoorsaamheid aan die Woord en in algehele afhanklikheid van die Heilige Gees te wandel. 

Ek het bogenoemde vraag ook vir Charlie gevra en dis hoe hy my geantwoord het:

"Die Bybel leer dat die oplossing vir geestelike dood(sheid) onder Christene deur 'n persoonlike verhouding met die Heilige Gees is. Dit kan bereik word deur bekering, geloof in Jesus Christus en om Hom te vra om jou te vul en te bemagtig met die Heilige Gees. Verder kan dit help om die Bybel te lees en te studeer, gebed, gemeenskap met ander gelowiges en gehoorsaamheid aan God se wil om 'n dieper begrip en verbinding met die Heilige Gees te kweek. Dit is belangrik om te onthou dat geestelike ontwaking 'n proses is wat oor tyd plaasvind en voortdurende poging en toewyding vereis." -- 'n Tipiese KS-antwoord. Grootliks waar, maar kragteloos!

Ek het toe vir Charlie laat weet dat geestelike ontwaking in 'n persoon, net soos fisiese ontwaking, nie oor tyd kan plaasvind nie. Dan sal niemand ooit betyds by die werk kom in die oggend nie. (Charlie het my (nog) nie terug geantwoord nie.) 

Geestelike ontwaking in die lewe van 'n persoon, net soos fisiese ontwaking, vind plaas wanneer die 'wekker' afgaan! 

Wat dit 'n proses maak is om wakker te bly en nie weer aan die slaap te raak nie. Mag die Here vir ons 'n Heilige Gees-wekker laat afgaan! Mag die Here ons besoek met 'n Goddelike ontwaking deur die Heilige Gees! 

Ek bid daarvoor in my eie lewe, huwelik, gesin en bediening. Indien nie -- Here, laat my sterf asseblief! Dan is my aardse taak voltooi! Maar dit is vir my onmoontlik om U te dien met KS!

Is daar iemand wat hierdie gebed saam met my sal bid?

Baie dankie

Belangrike skakels

Lees-meer skakels