Die Here het my opnuut belas met die voltooiïng van Sy Groot Opdrag ten spyte van die feit dat Projek KuberWêreld tans verhoed word om deur middel van Facebook die Evangelie uit te stuur na die die mins-geëvangeliseerde wêreld. Gelukkig het die Here Jesus Sy Groot Opdrag nie slegs aan Projek KuberWêreld gegee nie, maar aan Sy Kerk in die geheel. Dus, terwyl ons dit nie self kan doen nie, kan ons andere help en toerus wat dit wel kan doen! Dit is bitter eenvoudig vir enige persoon wat 'n Facebook rekening het om die bostaande uitreikboodskap die onbereikte wêreld in te stuur. Op hierdie webblad verduidelik ons in besonderhede hoe om dit te doen.

 

Die groot probleem lê nie by die sendingveld en hoe om dit te bereik nie, dit lê by die Kerk! Daar bestaan eenvoudig 'n tragiese gebrek aan visie, belangstelling, dringendheid en wil in die Kerk van Jesus Christus om die Groot Opdrag te VOLTOOI! Die verskil tussen om by sending betrokke te wees en betrokke te wees by die voltooiïng van die Groot Opdrag is eenvoudig net dit -- die eerste is om die Evangelie te neem na die ongeredde wêreld, terwyl laasgenoemde is om die Evangelie te neem na die onbereikte wêreld.

 

 

 

Voltooiïng van die Groot Opdrag is meer as 'n taak -- dit is 'n oorlog!

 

Voltooiïng van Jesus Christus se Groot Opdrag is 'n geestelike oorlog! Dit is belangrik om te verstaan dat die Satan die voltooiïng van Jesus Christus se Groot Opdrag met alle mag teenstaan! Vir hom is dit 'n oorlewingstryd. As die Kerk van Jesus dit regkry om elke volk, stam en taal met die Evangelie te bereik, is sy doppie geklink -- want dan gaan Jesus Christus terugkom as Koning van die konings. Ons moet dus nie verbaas wees dat hy hierdie doelwit met al sy mag teenstaan nie. Dit is dus belangrik om te weet: waar woed hierdie oorlog?

 

1. Op die sendingvelde van die wêreld

 

Elke sendingveld -- en in die besonder elke onbereikte sendingveld -- is 'n oorlogsone. Vra maar vir elke sendeling. Projek KuberWêreld het dit oor die jare ondervind. Die teenstand wat ons vanuit die Moslem, Hindoe en Boedistiese wêrelde, sowel as Facebook ondervind het, is getuienis hiervan.

 

2. Binne sendingorganisasies en -bedieninge

 

Daar is egter ook 'n oorlog wat woed binne sendingbedieninge en -organisasies. Twee taktieke wat die Satan met groot sukses in sendingaksies gebruik om hulle bedieninge onvrugbaar te maak is, verdeeldheid in die binnekring en 'n gebrek aan gebeds- en finansiële ondersteuning.

 

Ek weet van minstens drie sendingbedieninge waar die Satan verwoesting gesaai het deur huweliksverbrokkeling en egskeiding. Dit is buiten die wapen van verdeeldheid tussen medewerkers wat hy met oorgawe gebruik om die werk van die Here lam te lê.

 

Die Satan se geliefkoosde taktiek is gebrek aan ondersteuning en fondse. As hy dit kan rekry om 'n sendingbediening se fondse af te sny, het hy sy doel bereik. Gewonde geroepenes lê verstrooid op die sendingslagvelde as gevolg van gebrek aan gebeds- en finansiële ondersteuning.

 

3. Binne die Kerk

 

Die strategie wat die Satan hier by uitnemendheid gebruik is geestelike kortsigtigheid, selfbelang en 'n gebrek aan sending- en in die besonder wêreldsendingvisie. 'n Baie groot deel van die Christelike Kerk is primêr besig met hulleself en hulle eie gemeentlike behoeftes. Daar bestaan 'n tragiese gebrek aan visie, belangstelling, dringendheid en wil in die Kerk van Jesus Christus om die Groot Opdrag te VOLTOOI!

 

Hierdie is die grootste probleem. As ons hierdie probleem kan oplos, sal die oorlog op die sendingveld en binne sendingorganisasies en bedieninge gewen word -- want dan sal die nodige gebeds- en finansiële ondersteuning in plek wees.

 

Om hierdie oorlog te wen moet elke kind van die Here en elke gemeente daadwerklik betrokke wees by gebeds- en finansiële ondersteuning aan hulle wat voltyds geroep is na die sendingveld -- en by name, na die onbereikte wêreld!

 

Operasie Een Ding

 

Dit bring ons weer terug by die vraag, hoe gaan die Kerk dit regkry om Jesus Christus se Groot Opdrag te voltooi? Nadat ek baie met die Here geworstel het in gebed oor hierdie vraag, het Hy drie riglyne aan my openbaar:

1. Daar moet ‘n passie van die Heilige Gees brand in die harte van Christene vir die Evangelie en die voltooiïng van Jesus se Groot Opdrag.
2. Daar moet ‘n strategiese plan van aksie bestaan ten opsigte van hoe hierdie doel bereik kan word.
3. Elke Bybelgelowige Christen, kerk, gemeente en sendingbediening oor alle grense moet prakties en doelgerig deel kan word van hierdie plan. Met ander woorde, dit moet ‘n gesamentlike, ingeslote, eendragtige en gefokusde poging wees.

Met hierdie drie punte in gedagte het ek gedurende 2015 in opdrag van die Here met 'n nuwe projek begin met die naam, Operasie Een Ding. Operasie Een Ding se doel was om die visie vir die voltooiïng van die Groot Opdrag aan die Kerk van Jesus Christus oor te dra en die Kerk te help mobiliseer om hierdie doelwit te help uitvoer.

 

Hierdie is egter 'n goeie voorbeeld van 'n belangrike projek wat 'n dodelike wond toegedien is in die geestelike oorlog op die sendingslagveld. Daar was so 'n gebrek aan belangstelling dat ek die projek op die rak geplaas het. Na sewe jaar het die Here egter op 'n drastiese en dramatiese wyse my aandag weer op hierdie projek gevestig en beklemtoon dat dit 'n integrale deel is van Projek KuberWêreld se bediening. Die Here het my daaraan kom herinner dat Hy my spesiaal vir hierdie taak voorberei en geroep het -- en dat ek nie mag terugdeins vir die aanslag van die vyand nie.

 

Ek moet egter met u eerlik wees, ek voel magteloos om alleen hierdie projek weer te laat herleef. Daar sal 'n deurbraak van die Heilige Gees moet kom en die Here sal deure moet oopmaak. Intussen gaan ek egter voort met die voorbereidingswerk in gehoorsaamheid aan die roepstem en opdrag van die Here. Ek versoek dus hiermee ernstig dat u vir my en die Operasie Een Ding projek sal bid.

Baie dankie

Belangrike skakels