Projek KuberWêreld -- Februarie/Maart 2022

Published: Wed, 02/23/22

Beste

Projek KuberWêreld

Bereik die Wêreld met die Evangelie deur die Internet

Februarie/Maart 2022 Nuusbrief

Wees gegroet in die aloorwinnende Naam van Jesus Christus

Jes 8:17: En ek sal wag op die HERE, wat sy aangesig verberg vir die huis van Jakob, en op Hom hoop.

Wag op die Here

Ek vra om verskoning dat ek nie in Januarie 'n algemene nuusbrief uitgestuur het nie, maar ingewandskoors het my platgetrek en ek was vir byna 'n maand buite aksie.

Hierdie maand was vir my 'n groot beproewing, want buiten my siekte het ek ook nog geworstel met die Here se plan met Projek KuberWêreld vir die toekoms. Waardevolle raad wat ek van een van my gebedsvriende ontvang het was, "wees geduldig". Nou-ja, ek moet erken dat 'geduld' nie een van my sterk punte is nie. Om te wag en in 'n tou te staan of te sit is een van die moeilikste dinge in die lewe vir my. Nou kom ek agter dat dit juis hierdie punt is waaraan die Here in my karakter werk. Ek verstom my oor die Here se geduld met my. Dit was ook vir my interessant om waar te neem dat die woorde, "wag op die Here", minstens sewe keer in die Psalms alleen voorkom.

Maar nou-ja, sonder om ongeduldig te wees (en ek hoop jy is geduldig met my), wil ek net weer kortliks Projek KuberWêreld se behoefte, soos ook in ons vorige nuusbriewe verduidelik, herhaal.

Projek KuberWêreld soek 'n vennoot

Projek KuberWêreld het oor die afgelope ongeveer twaalf jaar, miljoene mense in die mins-geëvangeliseerde wêreld bereik met die Evangelie van Jesus Christus deur middel van die internet en digitale media. Gedurende 2020 en 2021 alleen, het ons 7,31 miljoen mense bereik deur ons Facebook advertensies. Gedurende die middel van 2021 het Facebook egter ons advertensierekening gesluit -- waarskynlik as gevolg van volgehoue weerstand vanuit Moslem, Boedistiese en Hindoe lande oor die afgelope jare.

Projek KuberWêreld en sy susterprojekte bestaan uit minstens sewe webblaaie wat oor 'n verskeidenheid bronne beskik wat alles gaan oor die uitdra van die Evangelie van Jesus Christus na die wêreld en die maak van dissipels. Hierdie kosbare evangelisasie- en dissipelskapbronne is van onskatbare waarde vir enige sendingbediening. Ek wil graag hierdie bronne oorgee aan ‘n bediening wat dit vrugbaar kan gebruik in diens van die Evangelie.

Projek KuberWêreld beskik oor die potensiaal om groot waarde toe te voeg tot 'n bestaande bediening. Projek KuberWêreld kan 'n digitale dimensie toevoeg en tot enorme voordeel werk vir 'n bestaande sendingaksie of bediening met 'n visie vir die wêreld en 'n las vir siele. Projek KuberWêreld kan ook 'n digitale mobiliserings- en ondersteuningsaksie toevoeg tot 'n bestaande bediening wat tot groot finansiële voordele kan lei. Selfs internasionale en wêreldwye ondersteuning kan gewerf word as ons 'n span is wat saamwerk.

My grootste beperking is dat ek nie man-alleen al die verskillende funksies kan vervul nie. Spanwerk kan die verskil maak. Roep die Here dalk vir jou, of jou bediening, of dalk jou gemeente? Het jy 'n aanvoeling vir die digitale media en webbladontwikkeling, tesame met 'n visie vir die wêreld en 'n las vir siele. Ek erken dit is 'n seldsame kombinasie - daar is nie baie van ons in die wêreld nie. Maar as jy 'n visie vir die wêreld en 'n las vir siele het, en beskikbaar is vir die Here se roeping, sal die Here die res voorsien.

Wat is nou die pad vorentoe? Dit is my oortuiging dat die Here besig is om 'n sendingbediening of 'n persoon of persone, of albei, te roep en voor te berei om in vennootskap met Projek KuberWêreld te gaan, en/of om die bediening verder te neem. Vir meer besonderhede sien ons vorige nuusbrief.

Het jy die Evangelie hierdie afgelope maand op jou digitale media met iemand gedeel?

Onthou, jy is Projek KuberWêreld se belangrikste vennoot. Nou dat Facebook ons advertensierekening gesluit het, is jou en my digitale instrumente Projek KuberWêreld se enigste kanaal na die wêreld daarbuite. Onthou, jou selfoon is God se instrument om die wêreld met die Evangelie te bereik. Projek KuberWêreld verskaf aan jou 'n 'traktaatjie' op jou selfoon. Die wonder van die sosiale media is dat ons nou 'n digitale 'traktaatjie' na 'n hele klomp mense tegelyk kan stuur op 'n groep. Volg hierdie skakel om te sien hoe jy Facebook kan gebruik om die Evangelie die wêreld in te stuur.

The Most Important Truth

Hier is 'n nuwe uitreikartikel waarmee jy kan uitreik na jou digitale wêreld: 'The Most Important Truth'. Al wat jy hoef te doen is om die 'share' knoppie op die webblad te druk of om die skakel op jou sosiale media groepe te deel. So eenvoudig soos dit.

'n Ander Evangelie -- 'n Ander Jesus

Ek het hierdie afgelope maand 'n boodskap gehoor wat my ten diepste ontstel het. Die misleiding waarvan die Woord ons waarsku, slaan toe baie naby aan die huis. Net die gedagte dat sommige van my geliefdes en vriende in hierdie dwaling gevange mag wees, laat my in diepe onsteltenis. Ek het geen keuse gehad as om ''n Ander Evangelie - 'n Ander Jesus' te skryf nie.

Baie dankie

Hierdie bediening is afhanklik van die vrywillige finansiële ondersteuning van kinders van die Here wat ons visie deel. Baie dankie aan elkeen wat op een of ander manier vir Projek KuberWêreld help om die Evangelie uit te dra na al die nasies. Baie dankie aan elke medewerker wat betrokke is in gebedsondersteuning, finansiële ondersteuning, digitale uitreiking of mobilisering. Mag die Here u ryklik seën!

Indien u of u gemeente ‘n bydrae wil maak, kan u die skakel na ons bankbesonderhede hieronder vind.

Belangrike skakels

Projek KuberWêreld se Tuisblad

Hoe om betrokke te raak by Projek KuberWêreld
Ons bankbesonderhede

Opregte Jesus-liefde

Elmer Grobler

Projek KuberWêreld

admin@sepprograms.com