Projek KuberWêreld -- Maart/April 2022

Published: Wed, 03/30/22

Beste

Projek KuberWêreld

Bereik die Wêreld met die Evangelie deur die Internet

Maart/April 2022 Nuusbrief

Wees gegroet in die aloorwinnende Naam van Jesus Christus

"Vir hierdie evangelie ly ek verdrukking, selfs in boeie soos 'n misdadiger, maar die woord van God kan nie geboei word nie."

2 Tim 2:9 (NAV)

‘n Mens-gemaakte verleentheid word ‘n God-gereëlde geleentheid

Ek wil jou graag vertel van ‘n wonderlike geleentheid wat die Here vir my geskep het hierdie afgelope maand om die Evangelie te deel. Ek is uitgenooi na ‘n sosiale geleentheid wat eintlik vir my ‘n verleentheid was en waar ek niemand van die gaste geken het nie. Ek bevind myself toe in die geselskap van ‘n leraar, ‘n wetenskap professor en ‘n ander persoon, wat in ‘n Christelike gesprek betrokke was. Al drie persone was op een of ander wyse verbonde aan dieselfde universiteit en ek het afgelei dat hulle mekaar vandaar ken.

Ek het aanvanklik nie deelgeneem aan die gesprek nie aangesien ek ‘n buitestaander was. Ek was egter absoluut gefasineer deur my vriende se Bybelse gesprekke wat duidelik vanuit drie verskillende leerstellige (of ervarings-) hoeke gekom het, maar tog in ‘n baie opbouende en goeie gesindheid plaasgevind het. Die temas waaroor hulle gepraat het was absoluut relevant en dit het onderwerpe behels waarmee hulle geloofsworstelinge ondervind en waaroor ek self verskeie artikels geskryf en gepubliseer het.

Nadat ek vir ‘n geruime tyd net geluister en niks gesê het nie, het ek ervaar dat die Heilige Gees my nou inspireer om betrokke te raak in die gesprek en ek het die gesprek in ‘n evangeliese rigting gedruk. Ek het net ervaar dat die Heilige Gees oorneem en het verstom gestaan oor hoe die Here ons gesprekke lei. Ons het letterlik vir ure gepraat. Later het ‘n vyfde persoon ook by ons aangesluit (wat ek geken het en vir wie ek ‘n las vir redding het). Hy het nie ‘n woord gesê nie, maar was duidelik blootgestel aan die mees intensiewe evangeliese gesprek van sy lewe.

Om ‘n lang storie kort te maak, twee van die persone in ons gesprek het belang gestel om die artikels wat ek geskryf het te lees en kon ek dit met hulle digitaal deel. Die artikels is die volgende:

Hoe Om Jou Ware Doel En Roeping In Die Lewe Te Vind – Die Geheim Van Jou Drievoudige Doel.

Die Kerk Se Identiteitskrisis

Word Vry!

Ek sal graag eendag in die hemel wil sien wat die ewigheidsgevolge van hierdie dag se gesprekke was.

Bogenoemde bronne is tot elkeen se beskikking om die Evangelie te help uitdra na ‘n verlore en deurmekaar wêreld.

Die Woord van God en die Evangelie kan nie geboei word nie ...

In ons vorige nuusbriewe het ons dit onderstreep dat daar ander moontlikhede as Facebook bestaan vir Projek KuberWêreld om ons boodskap uit te dra, maar dat dit die ondersteuning van kinders van die Here vra. Terwyl Projek KuberWêreld nie tans kan adverteer nie weens Facebook se sluiting van ons advertensierekening, vind vele ons artikels op Google. Dit is veral ons Afrikaanse artikels wat op Google gevind word. (Ek het ‘n sterk vermoede dat Google ook sommige van ons Engelse webblaaie en artikels sensor.)

Tot op datum was daar 36,053 besoeke op ons Afrikaanse artikels vanaf datum van publikasie.

Ons is dankbaar aan elke persoon wat op een of ander wyse aan die Evangelie blootgestel word.

So lyk die resultate wanneer daar 'n ondersteuningspan is wat saamwerk

Terwyl Projek KuberWêreld nie tans kan adverteer nie weens gebrek aan ondersteuning, gebruik die Here ander bedieninge om die Evangelie die wêreld in te dra. Global Media Outreach se bediening is baie dieselfde as die van Projek KuberWêreld. Hulle is net baie groter en geniet die ondersteuning van baie Amerikaanse kerke, Christene en finansiële bronne. Loof en prys die Here vir hierdie bediening!

Sedert 2004 was daar reeds meer as 2 biljoen besoeke op hulle Evangeliese webblaaie en sedert 24 Februarie 2022 toe Rusland die Oekraïne binnegeval het tot en met 7 Maart 2022 ('n tydsbestek van 12 dae), was daar 12,819 mense wat aangedui het dat hulle Jesus Christus as Verlosser aangeneem het in die Oekraïne alleen. Deur die leiding van die Heilige Gees en die ondersteuning van die Kerk was GMO op die regte tyd op die regte plek (op die internet)!

Lees gerus ook hierdie artikel: Reaching People All Over the World Through the Web wat in Outreach Magazine verskyn het.

'n Belangrike oorsaak van geestelike stagnasie, -blindheid en -agteruitgang

'n Belangrike aspek van Projek KuberWêreld se visie is dissipelskapopleiding. Hier spits ek myself toe om artikels te skryf oor onderwerpe waarmee ek in my eie geestelike lewe geworstel het -- met antwoorde wat die Here aan my geopenbaar het uit die Woord in my soeke na die waarheid en begeerte na geestelike groei. Gedurende 1995 tot 2002 het ek Die Dissipelmaker tydskriffie gepubliseer en hierdie is eintlik 'n voortsetting van Die Dissipelmaker-bediening.

Terwyl Die Dissipelmaker nie meer in drukvorm versprei word nie, leef die inhoud egter steeds voort in digitale vorm op die internet, waarvan ek die skakels gereeld deel in hierdie nuusbrief. Ek poog ook om soveel as moontlik van hierdie artikels in Engels te vertaal sodat dit tot die hele wêreld se beskikking is op die Scripture Educational Programs Discipleship en Resources webblaaie.

Hiermee stel ek dan graag my nuutste artikel bekend: Waarom Dit Belangrik Is Om God Se Gedelegeerde Gesag Te verstaan. Ons leef in 'n tyd van enorme geestelike verval. Wat sou die oorsaak daarvan wees? Het jy al ooit gewonder waarom so baie Christene geestelik stagneer en agteruitgaan eerder as om geestelik te groei? In hierdie artikel spreek ek een van die belangrikste oorsake aan.

Baie dankie

Hierdie bediening is afhanklik van die vrywillige finansiële ondersteuning van kinders van die Here wat ons visie deel. Baie dankie aan elkeen wat op een of ander manier vir Projek KuberWêreld help om die Evangelie uit te dra na al die nasies. Baie dankie aan elke medewerker wat betrokke is in gebedsondersteuning, finansiële ondersteuning, digitale uitreiking of mobilisering. Mag die Here u ryklik seën!

Indien u of u gemeente ‘n bydrae wil maak, kan u die skakel na ons bankbesonderhede hieronder vind.

Belangrike skakels

Projek KuberWêreld se Tuisblad

Hoe om betrokke te raak by Projek KuberWêreld
Ons bankbesonderhede

Opregte Jesus-liefde

Elmer Grobler

Projek KuberWêreld

admin@sepprograms.com